გენერალური დირექტორი

ისტორიის მეცნიერებათა დოქტორი გიორგი კალანდია - საქართველოს ხელოვნების სასახლე კულტურის ისტორიის მუზეუმის  გენერალური დირექტორი

გიორგი კალანდია, ისტორიის მეცნიერებათა დოქტორი, საქართველოს ხელოვნების სასახლის გენერალური დირექტორია. იგი ასევე რამდენიმე პოპულარული ქართული სატელევიზიო გადაცემის ავტორი და წამყვანია. 2010 წლიდან იგი დავით აღმაშენებლის სახელობის უნივერსიტეტის პროფესორია, ხოლო 2012 წლიდან - ამავე უნივერსიტეტის საპატიო დოქტორი. 2007 წელს დაამთავრა ევროკავშირის პოლიტიკის სკოლა სტრასბურგში, ხოლო 2011 წელს - ოქსფორდის უნივერსიტეტის ECM College-ის ინგლისურენოვანი პროგრამა დუბლინში.

2004–2011 წლებში, გიორგი კალანდიას ხელმძღვანელობით, სამეცნიერო ექსპედიციები მოეწყო თურქეთში, ინდოეთში, ეგვიპტეში, აზერბაიჯანში, სომხეთში, პორტუგალიასა და ინგლისში. ექსპედიციების მიზანი საზღვარგარეთ მცხოვრები ქართველების, ე.წ. „ჩვენებურების“, ტრადიციების, ფოლკლორისა და ისტორიული არტეფაქტების შესწავლა იყო. ექსპედიციების ფარგლებში ფირზე აღიბეჭდა ათობით ქართული სოფელი, ფოლკლორის ნიმუში და ისტორიული ძეგლი.

2015–2016 წლებში გიორგი კალანდიამ ირლანდიის ეროვნულ ბიბლიოთეკაში დაცული, ცნობილი ქართველი მეფის, ერეკლე II-ის შესახებ მანამდე უცნობი ისტორიული წყაროები შეისწავლა. მისი კვლევა 2017 წელს გამოიცა სახელწოდებით „მეფე ერეკლე ბრიტანულ და ირლანდიურ პრესაში“. გიორგი კალანდიას არაერთი ნაშრომი აქვს მიძღვნილი ქართულ-ევროპული ურთიერთობებისადმი, მათ შორის: „იტალია საქართველოში: ათასწლოვანი დიალოგი“ (2011), „შექსპირი ქართულ მხატვრობაში“ (2013), „შექსპირი ქართულ თეატრში“ (2013), „უორდროპები და საქართველო“ (2014), „ქართველები პირველ მსოფლიო ომში“ (2014), „გერმანელი მხატვრები და კავკასია“ (2015), „შექსპირი ქართულ სცენაზე“ (2016).

2006 წელს გიორგი კალანდიამ სამეცნიერო მონოგრაფია მიუძღვნა ზუგდიდის, გორდისა და სალხინოს დადიანთა სასახლეების არქიტექტურულ ანსამბლებს. მან შეისწავლა სასახლეების მშენებლობის ისტორია, სამეგრელოს მთავართა სასახლის ეზოს განაშენიანება და ზუგდიდის ისტორიული მუზეუმის დაარსებასთან დაკავშირებული ისტორიული პროცესები. იგი ასევე პირველი მკვლევარი იყო, რომელმაც თურქეთში მცხოვრები ცნობილი ქართველი საზოგადო მოღვაწის, აჰმედ მელაშვილს, ბიოგრაფია შეისწავლა და გამოაქვეყნა. მისი კვლევა წიგნად - „ჩვენი ხალხის ლიდერი“ - გამოიცა.

2017 წელს გიორგი კალანდიას ხელმძღვანელობით განხორციელებულ სამეცნიერო პროექტს „ტექსტილი საქართველოდან“ ევროპის კულტურული მემკვიდრეობის უმაღლესი ჯილდო - „ევროპა ნოსტრას“ ჯილდო - მიენიჭა.

2018 წლიდან გიორგი კალანდია ხელმძღვანელობს შოთა რუსთაველის საქართველოს ეროვნული სამეცნიერო ფონდის მიერ დაფინანსებულ სამეცნიერო პროექტს „უცნობი ისტორიული წყაროები საქართველოს შესახებ (ტიუდორების არქივები)“.

2019 წლის 30 ივნისს გიორგი კალანდია საქართველოს სამეფო აზიური საზოგადოების (Royal Asiatic Society of Georgia)  გენერალურ დირექტორად აირჩიეს.