ფონდში წარმოდგენილია პირველი ქართული თეატრალური დასების საქმიანობისა და დადგმების ამსახველი ფოტომასალა: ცოცხალი კადრები „ვეფხისტყაოსნიდან“, სცენები სპექტაკლებიდან: „სამშობლო“, „ძმა და და“, „განქორწინება“, „ხანუმა“, „მზის დაბნელება საქართველოში“, „მეფე ლირი“, „ჰამლეტი“ და სხვა; ასევე არის ოპერისა და ბალეტის, იტალიური და რუსული ოპერებისა და სახალხო თეატრების საქმიანობის ვრცელი კადრები საქართველოში. ასევე არის პირველი ქართული ფოლკლორული ჯგუფებისა და კომპოზიტორების ფოტოები. მუზეუმის ფოტოკოლექცია მდიდარია პირველი ქართული ფილმების: „ქრისტინე“, „აკაკი წერეთლის მოგზაურობა რაჭა-ლეჩხუმში“, „არსენა ჯორჯიაშვილი“, „ჩემი ბებია“, „ამოკი“, „საბა“, „უკანასკნელი მასკარადი“ კინოკადრებით. ფოტოებისა და ფოტონეგატივების კოლექცია შეიცავს ივანე პერესტიანის, ალექსანდრე წუწუნავას, ნიკოლოზ შენგელაიას, ვლადიმერ ბარსკის, მიხეილ ჭიაურელის, ალექსანდრე დიღმელოვის, რეზო ჩხეიძის, თენგიზ აბულაძის, გიორგი და ელდარ შენგელაიების და სხვათა პირად არქივს, სადაც დაცულია როგორც ფოტო, ასევე კინომასალები. რევოლუციის შემდგომი პერიოდის ოპერისა და თეატრის დადგმების მრავალი ფოტოა, რომლებიც ძალიან მნიშვნელოვან ინფორმაციას გვაწვდის აკაკი ხორავას, აკაკი ვასაძის, ვერიკო ანჯაფარიძის, სესილია თაყაიშვილის, სერგო ზაქარიაძის, უშანგი ჩხეიძის, ვასო გოძიაშვილის, ალექსანდრე ჟორჟოლიანის და სხვათა შესახებ.